領隊的話：台中行踏第一工

誠歡喜閣佮各位親愛的志工朋友見面矣！誠久無來行踏，一切變甲真生疏，一來就輪值做領隊，予我感覺真……恭敬不如從命，所以我嘛是勇敢出席矣！

咱今仔日行踏，主要的訴求是：「落實民主，降低修憲戶橂」。過去咱人民作主志工團所主張的三个重要的訴求，已經陸續完成「修正選罷法、補正公投法」兩項重要的工課，這馬賰修改憲法這項上重要的工課，予咱繼續佇遮拍拚。

佮逐家分享三句話： 第一句：「上重要的物件，是目睭看袂著的。」第二句：「佇咧一陣人中間嘛仝款會孤單。」這兩句是阮最近咧讀的一本台語版《小王子》裡面看著的。第三句話是我真久進前佇《牧羊少年的奇幻之旅》這本冊裡面看著的，大約是按呢講：「當你若真心想欲完成一件代誌，全世界，甚至是全宇宙的力量攏會趕過來共你鬥相共。」

相信咱最後的理想佮目標攏是仝款的，希望制定一部新的憲法，一部合時合宜、可長可久的新憲法，紲落來會當建立一个新而獨立的國家，一个雖然真細但是真媠的國家……

無定著咱愛行真久、咱愛等真久，嘛無定著真緊就有一工咱的理想佮夢想就來實現，這種代誌真歹講，這種代誌袂按算的………咱繼續行落去就著矣！