行踏，轉斡拄著……

人民來行踏，轉斡拄著天頂的大日頭 日頭炤著我的心內 心內澹濕上殕的鬱卒　規的齊焦鬆 硩佇心穎重khuâinn-khuâinn的壓力　嘛敨放 日頭光佇我耳空邊　講話輕báng-báng 厝頭鳥　佇樹椏頂共歌放送

人民來行踏，轉斡拄著歐巴桑 歐巴桑問　修憲是啥物？ 敢會當趁較濟錢、買較濟物？ 敢會當逐工笑嘻嘻　tshit-thô佮看戲？

人民來行踏，轉斡拄著拍噗仔聲 逐家心花開規坪　三四十个做伙行 傳單種子一直湠 理念花蕊沓沓爆開　一捾閣一捾 向望融入番薯島　代代延續袂閣散

【作者紹介】

陳秀枝，筆名袖子。創作童詩、現代詩、散文、水彩畫。

‧曾任第二屆台灣兒童文學學會理事長、大墩文學獎兒童文學評審、空大兼任面授講師。

‧出版兒童文學著作四本(全由南投文化局出版) 、三本台語詩集、一本現代詩集。

‧召集志工在南投文化局圖書館用台語講繪本、在線頂Clubhouse用台語講繪本。