驚

「在我們臺灣人的天性中，一直存有一種怕，一種莫名其妙的恐懼，一種不安全感，好像隨時會被人家怎樣，──因為，三、四百年來，臺灣人在自己的土地上，從來不曾做過自己的主人，從來不曾決定自己的命運！怕，對誰都怕，怕別人，也怕自己，怕東怕西！臺灣人要站起來，第一──最重要的，刻不容緩的，就是要從血液裡，要從肉身上，狠狠拔掉這個怕！」

這段話是抄錄自林雙不老師的小說《大佛無戀》，前衛出版社1991年11月發行。二十九冬前，的確是按呢：咱佇家己ê土地上，毋捌做過家己ê主人，毋捌決定家己ê命運！驚，對siáⁿ攏驚，驚別人，嘛驚家己，驚東驚西！

按怎會講著這，起因是聽著高雄市罷免案被罷免人韓國瑜市長頂個月講出「不投票、只監票」這款話，伊會想出這个步數，頭殼真正清楚，知影臺灣人的天性中，一直有一種驚，一種莫名其妙的驚惶，一種無安全感，好親像隨時會予人按怎。論真講，咱人民kā罷免的權利uì政府遐收轉來嘛才起步爾，關鍵佇2016.11.29選罷法的修正，到taⁿ三冬外，有兩件罷免案（一件罷免成功），６６６高雄市長是第三件，後個月有第四件。咱學做主人敢學會ah？當tang被罷免人對伊ê支持者hoah出莫投票去監票，去ka看啥人遐好膽咧投票，市民會驚無？會no͘h，驚無頭路、驚生理bái、驚hông中傷、驚hông創空，無所不至驚！

另外，咱拄會使罷免投票的人民，嘛有誠袂慣勢ê，講做無好後擺莫選伊就好，何必罷免來勞民傷財。我會當體會，必竟，人民作主（逐家來做主人）m̄是簡單ê代誌，上勞力ê是：愛激頭殼做決定，而且愛為所做ê決定負責任。m̄知恁猶會記tit無？韓國瑜市長在競選期間誠推捒民主，伊ê觀點我真ka肯定，無的確有選民是因為聽著伊講民主來投予伊ê，咱來複習一下：

2018.11.06夜問打權節目：「什麼叫民主？人民作主嘛！人民才是老大。你做得不好的政黨你下台；做得不好的政治人物請你滾蛋，我換人做，這才是民主。」 2018.11.14岡山造勢晚會：「所有的政治人物，所有的政府，所有的政黨，絕對不能夠忘記初衷，絕對不能夠忘記，對選民神聖的承諾，這是我的看法，我負全部責任。我們要找回到民主最原始的精神，民主、民主、人民作主，對不對？」

今仔日這个坎站，毋管是市長，抑是市民，咱m̄-thang袂記--ê民主這條路。

最後，嘛是倒轉來林雙不老師小說的話，咱欲鼓勵高雄市民：對抗反民主ê放刁，第一，上重要ê，即時要緊ê，就是愛uì血內uì肉身，殘殘kā驚惶挽起來，六月六號這禮拜六愛去投票，投出同意票、抑是無同意票，攏是咧實踐人民作主。

人類上高貴的情操，就是無論偌爾仔艱難，攏愛堅持做家己ê主人！