創造一个好所在

1994年，是台灣度過威權社會，tú開始beh行向民主真重要ê一年，嘛是「人民作主」聲音，開始佇台灣各角落sio爭出現ê時陣。

翻看歷史，佇1994年進前，全世界已經發生過五擺ê核事故災難，包括：前蘇聯車諾比Chernobyl(7級)和克什特姆Kyshtym(6級)、米國三哩島Three Mile Island(5級)、英國溫士蓋Windscale(5級)、日本東海村Tokaimura(4級) ê核外洩事件，ah就是因為按呢，佇小小ê台灣島，tng當台灣政府beh起造第四座核能電廠時，一寡疼thàng土地、真替後代設想ê長者前輩，真緊就起身hauh出：核能四廠愛交hōo人民公投決定！

經過10冬ê苦行，2003年立法院總算制定出一部《公民投票法》，m̄-kuh戶橂蓋懸，hōo你成案難、beh通過嘛難。Gōng志工抱著非武力ê忍耐精神，只好繼續閣拍拚14冬，一直到2017.12.12才促使戶橂降低，完成人民thang真正做主ê民主任務。

仝佇1994年，tng當選民對五名違反人民意志ê無適任立委，beh行使罷免權（收回人民授權）， tsiah tú通過罷免提議戶橂，準備開始進行提案連署時，政壇老黨為顧全政黨私利，m̄願黨內同志hōo人民罷免，恐驚隨減少五席立委，強kā人民踢一邊去，橫霸政黨代民作主，隨佇立法院快速通過選罷法修改：提懸罷免案連署戶橂趴數、kā通過罷免戶橂對1/3提懸到1/2、嘛禁止併案舉行必須單獨辦理罷免投票。這種明顯刁難、阻擋tsiah tú進行一半ê罷免提案，閣處處提懸成案、通過ê戶橂，徹底藐視、thún踏咱做一个國家主人ê尊嚴。

回顧台灣自治史，佇1994年iah-bē改懸罷免戶橂進前ê威權年代，1953-1993期間bat有9件民代罷免案，攏順利通過罷免。國會全面改選，進入民主化初期ê台灣，款iáu閣是政黨代替人民作主，所以，佇1994年hit5名無適任立委，因為人民作主意志ê幼栽，袂勘得政黨作主大手骨ê摺拗，5件罷免案當然全部摃龜，惟黨意是從ê反人民立委，成功繼續霸權佔位，hōo政黨踢一邊去ê人民，kanna會當佇hia受氣chàm塗跤、火大gîng心肝。

Gōng-gōng志工團，經過23冬ê苦行，佇2016.11.29這工，立法院總算通過選罷法修正，台灣公民閣一擺kā失去ê罷免權the̍h倒轉來，到tann嘛已經辦過2擺罷免投票ah，佇恢復合理ê罷免戶橂後，2件罷免案各有成敗，無管伊是成功iah是失敗，咱所重視ê是人民有thang作主無？自1994年苦行到2016年，咱真拍拚，一直到kah罷免權，對據在政黨箝制，到收倒轉來咱人民ê意志之下，iah就是kā「政黨作主」成功轉倒轉來「人民作主」！

行佇台灣民主深化ê這條艱難路上，咱需要抱持「人民作主」精神，對抗、收服「政黨作主」惡習，這是咱每一个做國家主人，應該愛有ê基本認識。政黨是靠人民組成、支持、壯大起來ê，政黨絕對袂使忘本，若無，真緊你就會隨hōo人民放捒、泡沫化。

今年ê六、七月，隨tih beh閣有兩場ê罷免投票案，論真kóng，罷免權和選舉權，本底就攏仝款是憲法第17條所保障ê人民參政權，透過選、罷公職代理人，是人民對國家人事權ê重要參與。Ǹg望國家主人，會得珍惜民主先輩，真無簡單用23冬ê生命、意志，替咱辛苦拍拚，爭取轉來ê罷免參政權，選優汰劣，hōo咱ê政治公僕知影袂使貧惰、愛不斷精進，嘛ǹg望咱所有國家主人，會當kā依附政黨作主心態，轉化作人民作主意志。若按呢，台灣一定會當成做咱逐家所全心意愛ê好所在！

用這篇文章siàu念離開咱tú滿二年ê人民作主志工先輩──萬順兄。