法治佮民主

白衫烏褲頭戴笠

民主苦行廿五冬

公投選罷法修正

憲法嘛愛主人決

自1994年9月21號，這隊愛好民主人士，做伙uì龍山寺廣場，踏出民主啟蒙的第一步起，告今已經25冬矣。這25冬來，人民作主志工認真哩做一項工課，就是鬥陣「行出優美跤步，傳送民主芳khuì！」

「民主」，當然毋是干焦投票爾，咱尤其ǹg望會當透過這張選票，為台灣轉化出公平、獨立的「法治」效果。

德國希特勒，其實毋是靠民主的選票上台--ê（伊競選總統輸予興登堡），伊是靠「法治」不彰，搶著權位--ê。

1921年的德國，猶欠缺政黨法規範，希特勒利用法律猶袂禁止政黨擁有武裝力量，伊就成立納粹衝鋒隊。佇1930年德國經濟大崩盤、人心亂phùn-phùn的時，伊率領納粹黨衛軍，以恐嚇、監視、暗殺、放火的暴力手段，壓逼選民投票予in，予納粹黨取得濟濟國會議席。簡單講，希特勒根本就是靠攑銃起家--ê。

彼陣的德國威瑪憲法，因為無副總統職務的設計，嘛無總統缺位時的遞補規定。致使，希特勒得到機會，利用興登堡總統無張持過身的憲政危機，以伊前仔佇政鬥所取得的總理身份，壓逼國會相連紲通過違憲法案，其中包括暫停總統的選舉，嘛中止總統的職權，kā總統職權改換予總理承擔，就按呢，兼任總統職權的希特勒總理， tsuân變做德國的三軍統帥，比進前干焦tshuā領納粹黨衛軍、納粹衝鋒隊，是囂俳甲強欲píng過矣。

本底，按照威瑪憲法的規定，總統若佇任內死亡，是愛交予最高法院院長代理，一直到選出後一任總統為止。所以，希特勒上台做德國的元首，根本就是一場政變。

希特勒嘛是有照步來，伊所主導的奪權違憲案，佇國會通過半個月後舉辦了公投，有88%的選民投出同意票。

聽講北韓人民的向心力閣較強，in選舉的投票率，定定會當懸甲99%，對選區候選人的支持率，嘛通達到100％。實在真驚人！

民主時代的台灣總統講：「威權時代，大家敢毋是攏會選擇服從？」伊真老實講出過去伊和大家做順民的共同無奈。

有影，威權時代的「法治」是啥貨？踢一爿去啦！最高統帥的一支筆，就通判人生死、定人刑期，「法治」只是予獨裁者提來khuè跤用--ê，「法」是伊欲用來「治」伊所認定非順民的工具。

可見，脆弱的「法治」，是無可能有「民主」--ê。「法治」若無穩固，就會佇幼稚的「民主」下，出現像希特勒這款病態的獨裁統治者。

人民作主志工團所主張的三項訴求：一、修正選罷法（2016年完成任務）；二、補正公投法（2017年完成任務）；三、降低修憲門檻（猶閣哩拍拚……），會當講攏是為著欲予咱國家的「法治」會得穩固，按呢佇生活中的「民主」才會當落實，嘛予咱毋免干焦賰「服從」通選擇。每一个國民攏會當活甲真自由、真安全，嘛攏會當盡本意去發揮家己的才華，過著幸福快樂的日子。

編按：本文有聲版，靜候發表。