勇敢的台灣人

「台灣島嶼原本美麗，受外邦統治了數百年……」這條歌是人民作主運動歌曲第9 條，有一擺珍珍擔任值日志工，伊問講：咱透早集合的時，敢會使唱這條歌？

就按呢，彼工所有的志工，攏做伙徛佇廟珵，綴著美月姐仔唱起這條〈勇敢的台灣人〉:「雖然英雄代代輩出，可惜攏半途來犧牲……」

人民作主志工團，較濟的是社會各界的資深公民，因為疼惜土地，為著囝孫的未來，kā民主啟蒙當做志業，行踏親像哩掘土，分傳單敢若是掖籽，流汗為著滋潤土壤，犧牲是欲轉化做成長的養份。

瑞祥兄，為非武力行動計畫安排來犧牲；進前為著補正公投法，博文兄帶病參與禁食；萬順兄禁食行動期間發病不起，遮的非武力戰士，一路堅持，戰甲倒佇戰場，攏是真予人敬佩的民主英雄！

甘地有講過：行使暴力真簡單，所有的精牲攏會曉；若非武力就較難，因為愛知影控制、會曉忍耐，這是人才做會到的，嘛是真正的勇敢。

非武力行動者的紀律真重要。瑞祥兄，伊總是有法度，kā掛佇伊制服面頂的志工名牌，和人民作主Logo的頂緣線，對甲齊--齊-齊，這有影愛有17冬的功力，才堅持會出來的。隊伍的整齊、穿插的一致、集體行動的恬靜，這就是紀律，有這款紀律，才會產生出無形的力量。

瑞祥兄愛讀冊，伊講伊逐各月，攏會固定對薪水內，撥一寡冊錢，去買幾本仔冊來看。這有影是無簡單，因為這馬的人，大部份攏看手機仔，已經真少人哩買冊看矣。佇街仔路恬恬行踏的志工隊伍，定定會去聽著人笑咱戇戇，in當然m̄知影，佇汗流規身、恬靜無聲的頭殼內，其實是有充滿智識，會堅持、忍耐的有理念勇者。

幾冬前的一擺行踏，佇中晝歇睏的公園交流分享時，值日的玲君志工，問起咱愛用啥物方式，來傳達民主理念較好？逐家攏真熱烈出來表示看法，現場主要有分做兩派，一派注重宣傳，一派強調感動。會記哩結束討論進前，拄好是5比5拍做平手。因為準備欲閣出發起行，瑞祥兄袂赴徛出來發表意見，我笑笑問伊講：我知影你一定是感動派的，對無？伊頕頭應講：著！

看伊行踏佇隊伍，你就會予伊的背影感動……「咱著拍拚！無論任何阻擋，排除萬難，扶持相牽，勇敢的台灣人。」