火車頂的烏褲事件

這件代誌已經一冬矣！

舊年台東行踏的第一工，逐家坐佇火車頂欲入台東市的時，有一个同工話題轉ui我遮來，無頭無尾，講我穿的烏褲是運動褲，兩爿有條逝（tsuā），上害的是褲頭嘛有條逝，按呢無及格。為著欲說明，伊講起家己空九年穿有條逝的運動褲參加49工的千里苦行，已經到行程尾仔幾工，佇水轉跤車頭的時，林先生kah伊交換意見的故事予阮聽。伊閣提坐佇我邊仔的另外一个同工做例，穿的樣款有合格。毋過我邊仔的同工，講伊穿的猶無夠正式……聽甲我頭殼攏拍結矣！

常常我會為著一个道理和同工講來講去、hue來hue去。彼工彼時，聽著烏褲無及格的講法，我無反駁，因為我心內有數，對家己三領仝款花草的烏褲嘛是無滿意，只是攏無處理，一四年穿到今嘛五冬矣！另外閣有兩領較慢買，是烏的無條逝，布料分寒熱，嘛是運動褲。

是按怎會攏無處理？第一，我人細漢，買長褲通常攏愛改褲跤，毋過買著彼三領，真拄好攏免改，這款難得的輕鬆，我特別珍惜，致使無想欲換褲。第二，我真罕咧買衫仔褲，這三領穿猶袂歹，就袂想閣買新的。

是講無及格的褲穿遐久矣，哪會毋較早kā我講ê？同工講，伊佇心內偷笑蓋久矣，彼工逐家佇火車頂，伊感覺是講出來的「天賜良機」。按呢講予我想著苗栗大埔事件，前縣長嘛講過天賜良機四字！

進前想講行路就是穿運動褲ah，哪有啥物毋著？閣較早，團體無建議穿烏褲的時，我攏穿牛仔褲。

到底，按怎穿是正式？

男性志工真好想，就是西裝褲，白色制服紮入去褲頭，皮帶縖咧就好矣！想起有前輩曾經分享伊去買褲的代誌，選好勢的時，kā店頭家講仝款的欲買三領，頭家感覺怪奇，鼓舞伊選一兩領別種色的，前輩講：我就是欲買烏的。我按怎想攏想無女性的正式烏褲生做啥款？這大概和我家己的穿插經驗有關係。佇我想袂清的時，同工提醒我斟酌看相片，這實在是一个好指示，嘛真正揣著答案矣！這時，我頭殼的結才拍開。嘛想著濟濟同工，in穿的褲真好看，我攏無去注意著。

毋過，換褲型穿，這和我的慣習確實有脫節感，所以買褲的代誌又閣拖落去……

有一工我才去想著足久無踅的成衣連鎖店，就先去in的網站看，看有適合的才去店揣。因為是換季特賣較俗，店家無改褲跤的服務，就按呢，褲買轉來猶是囥咧，我攏無提去hōng改褲跤，嘛發現我無適當的皮帶通好配這領褲……

這當陣想起予同工講烏褲無及格嘛滿周年矣，想講，「著的代誌」就愛來實踐！

毋知有人想過這件代誌無，是按怎恬恬行街頭做社會運動，穿插愛正式、愛撆紮？