葉博文先生最後講詞

我是葉博文，真感謝逐家參加我的──生前告別式。頭拄仔敏勇兄吟兩首詩，實在是台灣真優秀的詩節，真感謝！

此刻，我感覺著我家己的生命，雖然真緊咧流失，我家己真清楚，我腹肚脹起來。台灣人講的，講，膨肚么壽、膨肚短命按呢。醫生叫我繼續做──肝的血漿置換，我拒絕。

我chit-má欲用我上生命最後的階段，來做我做這世人上尾仔，我應該嘛愛懺悔，我一世人算講攏足調皮搗蛋的，但是我欲做上要緊的代誌，我堅持，所以我和眠床就無愛倒，是按呢。

我人生上重要的時站，大部分的時間，攏參與社會運動。阮囝嘛感覺小可怪怪，tah有這个老爸，生理也毋是䆀的，也毋是無趁錢，若趁錢攏走出去外口咧烏白i。

九七年，我擔任台北市二二八紀念館創館的館長。Chit-má我按呢，kah敏勇兄去做伙籌備，結果變作了後，伊逐項攏按呢真客氣，變我一个生理人走去做台灣二二八歷史的這个代誌的紀念館開創的館長，這是我一世人真光榮的時刻。過去歷遠來，我嘛是人民作主的志工，創á創來到chiáng時，二五冬，會當參與這个社會運動，是我相仝的榮幸，我欲kā這世人的這个榮幸，kā生命的最後一刻，還予咱的土地，我kā我會當做著的，欲還予咱心愛的台灣，最後，我想欲用盡賰的氣力講幾句話：

第一，我呼籲蔡英文總統，愛勇敢徛起來，面對中國的欺壓、統戰，繼續和台灣人做伙，台灣人絕對袂佇這款強權壓迫的下底面屈服的意志，絕對會展現出來。蔡英文真正毋免驚，逐个人攏會和你徛做伙。

我呼籲台灣人民，佇這台灣生存關鍵的時站，一定愛團結，你若認為你是台灣人，你台派的，毋通分裂，蔡英文你愛加油，生前我對伊嘛有真濟的無滿意，但是你愛加油，堅強起來，親像我今仔日我袂願倒咧眠床講話相仝意思，蔡英文，加──油！

志工，咱做伙唱〈我愛台灣〉，一世人朋友嘛遮的，就有夠矣！

「我愛台灣　我愛台灣　我愛台灣　我愛台灣　我愛台灣　我愛台灣　我愛台灣　我愛台灣　我愛台灣　我愛台灣　我愛台灣　我愛台灣　我愛台灣　我愛台灣　我愛台灣　我愛台灣」

我所有的朋友，參加這个告別式，我已經無煩無惱了。

編按：一九年三月十三這工是葉博文先生的生前告別式，這篇逐字稿是曹藍心志工透過台北公館教會提供的影片 https://youtu.be/ApOR2hpopys 來聽拍完成，感謝李敏勇老師以及邱珍雅、陳恆信、張堂庫志工協助校正。