「告別核電風光明媚」遊行隨筆

原本以為是無法度參加的，佇11點半趕緊坐著客運，總算是趕著，會當佇228紀念館會合加入遊行。

在隊伍猶未整隊啟程到凱達格蘭大道進前，聽著一位朋友感嘆：「希望這是最後一擺，攏行遮爾久啊！」我心想：「這哪有可能是『最後一擺』！」當然會當體會這位先進朋友的無奈心情。雖然，我確實也真希望是最後一擺。想起，在慈林政治家研修班結業式的時，聽楊欽年董事長講過勉勵學員的一段話：「這短短的六禮拜，是每一位學員人生精神的修練，但人生的修業，哪有遐爾簡單，彼是無完成結業的一工，是終其一生的。」確實民主的跤步，嘛是無可能有完成的一工，只要活咧，攏愛繼續前進。

在遊行現場搪著一位嘛是公職人員的朋友，伊在舊年參加地方基層的選舉，雖然落選，票數嘛算是懸票，總是第一擺參選經驗，也袂bái的成績，鼓勵伊再接再勵，總是比別人閣較勇敢。嘛講著有人落選了後，煞加入民進黨，為何會如此，講這咱攏可以諒解。畢竟，每一个人欲行的有可能是無一定仝款的路，但只要共同的目的地沒變，嘛會仝款支持；也若親像干樂咧轉，毋管是佇內框抑是外框，但咱共同的車心不變。

有一位前輩講：「你是公務員，你哪會敢出來行？」日後欲按怎行？我想我這隻米蟲，感謝前人前輩的努力付出，開疆闢土，已經將上坎坷的前段路拍平囉，賰這後段的路草，哪有親像頭前段遐爾困難，更加愛提出勇氣。懷著朝山、朝聖的心情，以有愧、懺悔、感恩的心念，愛勇敢行出來。

前輩閣講著：「有一寡同學的群組，意見理念袂合，就按呢退出群組。」我感覺講：「咱若是退出群組，如此一來，遐的惡毒者就更加歡喜矣。因此，咱就愛堅持到底，用友善的態度來面對，必要的時以非武力的方式抗爭到底，台灣社會內面，猶閣有充滿真濟真濟的惡毒者、早期的掌權者、以及伊的跟綴者、嘛有不自知的中毒者、無知者。相信，總有一工，遮的人總會良心發現；也相信其他的人，終其尾也會佮咱徛做伙。

有一位前輩問我：「你這是行第幾擺？」我回答：「應該無幾擺啦，但真正無去記這。不過，將每一次，攏當作是第一次。感覺用這款的心情，保持熱情的心，應該較袂退變。」今仔日沿路行當中，看著真濟閣較少年的朋友，一路充滿熱情的鼓聲，和用力的喝喊聲相隨，這更加鼓勵我。這股前進的力量，只要有人堅持行落去，就永遠袂消失。舊年的公投法，被惡毒者所利用，雖然心疼，嘛愛面對，接受這个結果，但嘛愛進一步的處理，也就是積極的改善，永不勼退，莫忘初衷，對理想的堅持。有民眾對公投反感的原因，是認為發起公投非常浪費資源，也被爛用公投，這確實是已經看著的問題，愛好好思考如何改善。