行向自由

真奇怪！咱這隊非武力瓜笠仔志工團，才拄好面向酷哥排好陣勢，頭前排tio̍h跍咧、後壁排愛徛咧，逐家kheh燒倚，tiàm佇古早英國領事館對面的打狗港邊，面帶笑容，耐心聽候咱的攝影志工，佇遐真斟酌li徒來徒去、撨準鏡頭，準備欲kā咱頭工的打狗民主行踏，留下珍貴的歷史紀錄。

To̍h佇這咧時陣，雄雄頭前出現一个東方女士的身影，全kā阮的目睭規个攏吸過去，這个女士，伊遠遠對一台遊覽車遐行倚來，行仔行，一直行到阮的頭前，無張持越頭一轉身，規身人煞開始，慢慢仔向後若徙若行，嘛有幾擺是橫向沓沓仔徙振動，徙仔徙，伊一爿看著攝影旅伴的手勢，一爿寬寬仔按照指示的方向徙行，這个女士伊見若徙一擺，就會越頭kā阮看一咧，敢講，伊是驚阮這陣人會雄雄拍無去？就按呢，徙到最後，伊已經徙來到酷哥的後壁邊仔。佇選好位置、徛在了後，真緊伊隨就排好POSE，佇伊面頭前的查埔旅伴，隨用噴射機的速度，替伊翕著愛真正好運，才拄會著的台灣民主風景。

本底，阮逐家攏愛配合攝影志工取景，認真去看酷哥的手勢，聽伊的指揮，才通做伙入鏡頭、留歷史。啥知面頭前，雄雄出現一幕觀光客翕相、取景的無聲戲齣，予阮看甲誠心適，實在強欲擋袂牢，想欲笑出來。

實在有夠趣味--ê！看著彼个翕相的查埔，一擺閣一擺，一直要求彼位女士，愛閣較向伊正爿加徙一寡，就按呢，彼个女士伊連徙四五擺，一直徙到伊的攝影師滿意，感覺會當kā伊所欲得的景緻，攏翕入去才準算，當然，阮這陣排甲媠媠媠，上蓋有紀律佮特色的瓜笠仔隊，一定早就予伊安排翕入去做伊的旅遊相片背景矣！

實在真想袂到，咱這隊穿插一致、行踏整齊、恬靜無聲的非武力行動志工團，煞變做打狗觀光旅客，所興chhuh-chhuh提來取景翕相，做in旅遊紀念的美麗風景。

看著頭前彼位女士，為著欲kā無容易拄著的台灣民主風景仝框入鏡，雖然人是背向著阮，m̄過佇每一擺的行徙位，伊攏會回頭kā阮看一咧，佇伊的目睭內，你會當看著伊充滿歡喜的興奮眼神，佇伊一擺閣一擺的回頭當中，你會當感覺著伊接載袂著的激動心花，好親像伊規个人，攏強欲飛起來唱歌、跳舞仝款。敢講，伊佇阮的身軀頂，看著夢中才會得出現的民主生活，鼻著會得予人精神輕鬆的自由空氣？！

阮li想，這位女士，伊的心內應該會真好奇，好奇講這陣穿插整齊、行路無聲，行動有紀律的瓜笠仔隊，到底是li行啥貨？in的主張、in的訴求又閣是啥物？

無偌久，阮嘛翕好團體相，有一位志工真熱情，行過去和這位女士拍招呼，順紲介紹阮的團體，嘛kā一張民主傳單，tu去伊的面頭前欲予伊參考，結果，你敢知影，伊煞m̄敢提！

仝款佇20分鐘前，當阮一路對哨船頭行過來，隊伍經過遊艇碼頭，搪著一位穿插撆紮、講話捲舌的紳士，伊拄和阮相閃身，欲行去碼頭坐遊艇，當伊看著阮隊伍安靜無聲行來，目睭雄雄變甲大大蕊，滿面笑容掠阮金金看，無意中伊的跤步煞放慢落來，阮的志工分傳單，m̄-bat有大細目，既若是好奇、有興趣--ê，攏會分伊一張，當志工行向這位紳士，頕頭了後，順紲欲kā民主傳單tu予伊的時，伊雄雄落一句英語，講：「I am overseas !」 隨就擛手越頭做伊行走去。

佇打狗港歇睏煞，當阮唱出〈我愛台灣〉欲起行離開的時，邊仔一陣觀光客內面，有一位女性，伊大聲用北京語，向阮喝出講伊嘛愛台灣！我無蓋把握，m̄知伊講伊嘛愛台灣的「愛」，到底是--佗一款形式的愛。

我顛倒較向望，伊和做伙來台灣觀光的彼寡朋友，會當愛著咱台灣自由的空氣。就猶離這馬無偌久的30冬前，若m̄是彼陣台灣，有出現彼葩焚而不燬的自由聖火，嘛袂照出台灣光明的民主大路。

既然，來到這个自由國度矣，哪m̄試做一擺自由人？提出勇氣，接受一份「人民作主」的民主傳單，這才是行向自由的起步！