民主度晬

古早，紅嬰仔若拄滿一歲，會講是「度晬」，自舊年12月12，立法院通過公投法補正了後，到今拄好滿一年。有愛好民主的人士，特別ka今年號做台灣「公投元年」。若照按呢講，咱拄煞場、鬧熱滾滾，無嫌跤酸，排隊排ka躼躼長，為著展現國家主人意志，拍死毋退，就是欲投下神聖選票，隨閣趕轉去厝內，坐佇電視頭前，等開票的結果等ka半暝仔兩點半的緊張、刺激心情，hef就真親像是咧替咱頭冬的公投元年「做度晬」！

講實在的，一歲的紅嬰仔，伊就猶咧流瀾，猶佇土跤咧爬來爬去，是欲按怎去要求伊：愛緊學會曉行棋子，抑是摃棒球咧？對著咱所爭取，才拄好滿一年的民主公投，寄望嘛是按呢。

一个十五歲的青少年，伊定著會比干焦會曉嘛嘛吼，隨時愛閣欶啾啾，才會得到安全感的度晬嬰仔，加較 gaau走、會跳；嘛一定會加較捌代誌，會曉關瓦斯、鎖鐵門、注意安全；凡勢，閣較厲害的，早就學會曉泅水、溜冰，甚至閣會曉寫出優美的愛情歌詩。

可惜啦！咱去予頇慢又閣失職的立法委員來ka咱耽誤，一誤誤咱十五冬的「民主春天」！

過去這十幾冬，咱佇鳥籠仔公投法的囚禁下，六案公投案，因為戶橂夭壽懸，致使無一案會當通過。做一个國家主人，咱無法度靠家己來決定國家的政策佮方向，顛倒愛去看代理人的面色，實在予人真厭氣，嘛真正真無天理。

十五冬後的這馬，咱用補正過、降低戶橂的公投法，一擺提出十个公投案，最後有七案通過。若講進前鳥籠仔公投法是民主零分，這馬補正過的公投法，應該算是及格矣！

十五冬前，若是遐的立委有成樣，yn就袂通過彼款的鳥籠仔公投，來囚禁台灣民主，阻礙國家進步。咱這馬嘛才爬出籠仔外，拄開始欲學行路。

若準十五冬前，咱有真優秀、閣真有民主素養的立委，會當替咱制訂一部合理閣投會出結果的公投法，經過十五冬的思考、辯論佮訓練，相信咱袂親像一歲的度晬嬰仔，人生才拄開幕，頭殼猶閣空空，凊凊彩彩、簡簡單單，就hong騙騙拐拐去。若有十五冬的經驗累積佮修正進化，咱的頭殼自然會愈來愈清楚：任何公投案通過，伊的後果是啥貨。咱嘛會成做一个真有自信的公投選民，根本袂閣想欲去仝討答案來抄。

逐家若是有認真、有注意，就會發現，其實佇今年的公投元年，台灣的民主，已經有沓沓仔咧落實，沓沓仔咧進步。

按怎講咧？咱看這回公投元年，所有的公投提案，原底是有37案，但是其中有27案，初初有通過一階段（1,879人連署）的提案戶橂，因為佇二階段（半冬內愛閣招28萬1,745人連署）失敗，致使袂當成案。

佇這27个失敗公投案內底，zhoax頭提案的人，有捌做過總統的，有做過立委的，嘛有過去是有大名聲的政治頭人。毋過yn所提出的訴求，好親像袂當得著人民認同，嘛可能是因為過去累積的政治信用度，已經流失ka差不多矣，致使無達到二階段的連署戶橂，煞來夭折失敗。

佇公投元年這一冬，咱看著過去規路反民主、反公投的濟濟坐佇懸位的權重者，經過「做度晬」這个轉化，予yn長久迷失佇威權、鴨霸的專制心靈，重新轉向光明的民主大路。

好，咱會使來歕蠟燭矣！（你的願望是啥物？）

編按：本文有聲版，蘇美月志工讀予你聽，請點 YouTube。