台灣頌
「山綠水清，美麗台灣，是你是我心所愛；自由國度，平和社會，佇你佇我心肝內。FORMOSA，叫你的名，充滿喜樂充滿愛；歡歡喜喜，快快樂樂，起造美好新世界。」
這條歌是李敏勇先生寫佇《美麗島詩歌》冊內的一首詩，詩人講若是ka配Beethoven所譜寫第九號交響曲的〈歡樂頌〉，就thafng ka當做〈台灣頌〉歌詞來合唱。
〈歡樂頌〉上早是兩百三十三冬前，歐洲詩人Schiller所寫的一首詩，佇這首德語詩內面，伊有講著「誠心」、「勇敢」、「恩賜」、「謙卑」、「知己」、「理想」、「美酒」、「團結」、「道路」；閣有「歡喜呵咾」、「迎向勝利」的「英雄氣概」。詩內嘛提起雖罔世界各地風俗慣勢無仝，無論啥物人信啥物宗教，無管素常行善、做惡的人，就算是地面上的野禽猛獸，抑是土跤底的毒蛇、蠍仔蟲，嘛攏仝款會得領受上天予所有物種的生命恩賜。所以，世間上的每一个人，攏應該算是仝活佇地球頂，同甘共苦的兄弟佮姊妹。咱若是倚靠天生的人性基礎，人佮人其實嘛是會當互相理解，相kap交陪做朋友，甚至為著理想，成做知己、做伙拍拚，鬥陣行咱的路，勇敢、團結，展現英雄氣概，歡喜迎向勝利！
對照人民作主志工，咱自較早「千里苦行」，一直行到這馬的「歡喜行踏」，一步一步完成了「修正選罷法」、「補正公投法」的訴求目標，咱每一位參與非武力行動的志工，攏是台灣民主深化的大英雄；遐的護持民主，佇邊仔偷偷仔出力的國人朋友，嘛攏是袂得欠缺的大功臣！
聽講Beethoven所譜的這條〈歡樂頌〉，因為歌詞意境懸、曲調優美，唱來歡喜快樂，予人會得振作，所以捌有兩个國家，就直接ka Beethoven所作的這塊曲，提來配yn家己改過的歌詞當做國歌；過去，歐洲共同體嘛ka〈歡樂頌〉選來做yn的會歌，尾後的歐盟，閣繼續提來ka當做盟歌。
公家一條曲的兩首詩，無論是Schiller的〈歡樂頌〉，抑是李敏勇改寫的〈台灣頌〉，詩意攏真符合咱人民作主志工的行動精神佮理想，而且嘛ka志工互相關心、鼓勵，團結、相挺的溫暖體貼攏表現出來，嘛唱出「人民作主、歡喜行踏」深深的向望！
