瓜笠仔
嘉義行動結束，我坐莒光的落南轉去揣爸爸媽媽，這擺隨身加紮瓜笠仔轉去，yn兩个看著我的揹仔縛一頂瓜笠，攏感覺真親切。瓜笠是作穡人攏有的，媽媽講我這頂瓜笠是一輾一輾紩的，攏總紩五輾，按呢紩嘛真在，較早牽線固定的瓜笠已經真僫買。我講這頂是大姊的，伊舊年放佇阮的車頂袂記得提，就予我ka討來戴矣。
彼工佇嘉義市內行路的時，風誠透，瓜笠攏戴袂著，我趁機會問爸爸媽媽按怎辦較好？Yn兩个想仝款，攏講：「縛巾仔，縛巾仔就袂予風吹走去。」我講行踏袂當縛巾仔啦！隊伍的瓜笠仔愛一致，清清氣氣。爸爸看我ka瓜笠戴咧，教我ui瓜笠仔的上邊仔，兩爿閣縛索仔來固定。
人民作主志工行動的時，是按怎欲戴瓜笠仔？愛講故事的老志工有講過，這頂瓜笠有台灣的意象，是咱遮特有的，咱的農民攏戴這咧作穡，遮日遮雨樸實好用。作田人是佮咱的土地上親近的人，yn所做的工課，所種作的物件，攏是咧晟養這塊土地的每一个人，為囝孫咧拍拚，咱敬佩農民！Ui 1994年開始，咱就用雙跤行佇咱的土地，曝日沃雨，佮農民仝款親近土地，戴仝款的瓜笠，汗水嘛仝款㴙㴙滴。佇每一段路程，鍛鍊佮提升家己的心志。
今年四月佇彰化行踏的時，有一段是ui二水車頭坐車去源泉車頭來起行，月台頂有一陣幼稚園的囡仔，有一个囡仔看著遮大陣戴瓜笠的大人，伊真好奇，講一句華語：「怎麼有這麼多農夫啊！」這个幼囡仔知影瓜笠仔佮農民是一體的，伊會當認捌著這點，聽著嘛真感心！可惜的是，佇外口欲聽著囡仔講台語，機會實在真渺茫。
這馬，因為國際經濟市場的關係，市面上加一寡無仝款樣式的笠仔，毋過人民作主志工，原在堅持戴咱台灣農民的瓜笠。逐家買瓜笠的時，m thafng買m著去。
Ui水上行往嘉義，隊伍行佇縱貫線，分傳單的志工分予坐佇田邊歇睏的一个作穡人，伊看傳單的模樣，予攝影的志工ka翕起來。背景是稻仔田，農民伊戴瓜笠仔，尻脊後一支徛在在的鋤頭，倒手爿一跤加薦仔，坐佇田邊樹仔跤，斟酌看「落實民主」的傳單，這个畫面予阮真感動，予我想著來寫瓜笠仔的代誌。
編按：本文有聲版，陳恆信志工讀予你聽，請點 YouTube。
