謙卑、謙卑、再謙卑？（台文）

民主、民主、閣民主！「落實民主」才是「謙卑」，經過普選出來的統治者，應當尊重人民（國家主人）的意志，這款意志通常會藉著憲法展示。

自1994年起，人民作主志工為喚醒人民當家做主的意識，經過22冬街頭苦行，最後，總算ka當年貪權霸位的第二屆立委修改提懸罷免戶橂的《選罷法》，佇存年年底（2016.11.29）由第九屆立委通過降低罷免戶橂修正案。佇恢復合理的罷免戶橂了後，咱才有法度ka無適任抑是違背人民意志的公職人員，藉用罷免的方式請yn落台反省。

隔轉冬2017年，因為人民慢慢仔清楚家己是國家主人，萬事袂當閣放外外，對著2003年第五屆立委所制定，14冬來見投都投袂過的公投案（攏總有六案），累積了愈來愈濟的民怨，最後，佇社會各界共同督促之下，由第九屆立委佇2017年12月12日通過《公投法》補正。這馬，咱對咱所關心、致意的公共議題，除了出喙批評以外，閣thafng用行動相招有志做伙推捒公投案，通過後要求政府照辦。根據中選會統計，到今，全國性的公投案已經收著三十七件，台灣民主活力已經愈來愈旺矣！

一件代誌無法度一擺就ka做好，或者是已經做好，閣刁工ka行倒退。咱看頂面這兩个民主倒退攎的法案，對yn一路修修補補的過程，咱thafng知影過去國會議員的素質，到底是生做啥款。領納稅人稅金做月俸的公職人員，若定定私心排頭前，公務彈後爿，hef就莫怪社會亂操操，國家袂進步。

做一个國家上懸民意機關的國會議員，應該是愛具備較懸的民主素養，那無，一定會害人民遭受不幸，替國家帶來災難。

咱看這69冬來（自1949年起），政府佇台灣所實施的外加、強制、移入式憲法，除了原底佇中國制定的175條以外，閣有國會對1991年到2005年增修的12條，攏總加加起來這187條的憲法條文，無一條有徵求過台灣人民的確認佮同意。

敢講憲法m是人民和政府做伙拍的契約？敢講憲法條文內容，只要政府單方面宣布，就thafng強制實施？攏免人民的頕頭、肯認佮具結？那講這無違背民主，無算鴨霸，按呢到底啥物才是鴨霸？

一个對國內人民鴨霸的政府，閣有啥物資格佮立場，去國際社會抗議他國的霸凌？

2005年國民大會所通過立委雙3/4修憲的懸戶橂，差不多已經予憲法凍結起來。講「謙卑」，上基本就是愛尊重人民的意志，頭步先愛ka憲法解凍救活，降低修憲的戶橂。紲落來，愛ka憲法每一條的條文，送來國家主人的面頭前，經過一條一條的檢視審校，才會當予人民意志，融入憲法所有的條文內面。經過按呢做了後，人民才算是和政府完成確認憲法合法性的授權契約行為。這時，才算ka國家主權交還予人民，人民真正當家做主。只有按呢，才是真正的謙卑。

編按：本文有聲版，闕杏芬志工讀予你聽，請點 YouTube。