領隊的話

日期：20180929

地點：嘉義車頭

今仔日，咱為著欲堅持「降低修憲門檻」的理念，佇遮來集合。到底咱台灣上需要的是啥？平常時我定定呵咾咱的公約，咱的行動公約我非常的歡喜，我真贊歎它！伊的內容，是一个民主社會、民主國家的國民，上基本的素養的內涵。咱若ka讀落、ka內化、會當佇咱的生活ka用出來。其中伊包括著：咱是為著欲愛一个充滿著希望、慈悲、愛的國度，甚至閣講咱為著不公不義的代誌才來拍拚。拄仔值日恆信志工有講：這咧位仔是咱一个足有名有名的畫家陳澄波，伊佇遮予人槍決，無理由的槍決，甚至伊的大體袂當予伊的家屬領轉去，佇遮ka曝曬三天。ka想看這種的無人權，佇彼時陣yn ee字典內底，並無人權，干焦有yn ee黨權佮yn ee暴力。

所以咱愛為著不公不義的社會，今仔日佇遮欲創啥？咱欲佇遮堅持，咱欲佇遮堅持咱的信念，咱穿著這領衫，咱這制服，咱就愛知影咱的責任有外大。咱那有這咧信念咱的堅持，咱就會去影響著咱旁邊、ka咱擦身而過的人、抑是店頭的人、ka咱影著的人。yn這陣人咧創啥？yn會去深思，yn會去檢討，那按呢咱就影響著yn敢m是？

閣一項，咱嘛愛支持仝款的信念，m過無仝款方法的團體抑是人，咱愛ka伊支持，有台灣意識的團體加減支持，m是講一定愛金錢，m是啦！咱都ka伊拍噗仔、ka伊おうえん、ka伊鼓勵，按呢嘛會增加yn ee力量。紲落我希望咱逐家佇厝的時，m是咱活動的時間，咱定定來祈禱，咱來祈禱，咱的社會就會當改變完成，感謝恁！

編按：

一、本文由曹藍心志工拍字。

二、文中有摻華語：贊歎它、曝曬三天、旁邊、擦身而過。