降低修憲戶橂（有聲文）

人民作主志工24冬來，四界行踏分傳單，ui台灣頭行甲台灣尾，一波過一波的千里苦行，一擺閣一擺的決志禁食，攏是為著這部《公民投票法》。

舊年年底，經過14冬來來去去成員變化的立法院，最後，總算是ka這部佇2003年制訂，歸尾毋捌予人民公投成功的《公投法》完成了補正。

這馬，咱算是等著一部會當投出結果來的《公投法》矣！

毋過，這部《公投法》伊刁工ka佮憲法有牽連的攏排除掉，無欲予人民公投。所以，咱無法度利用修改過的《公投法》，來公投決定咱家己想欲和政府簽訂的契約內容。

也就是到今為止，咱憲法內面的所有條文，攏猶原未得到人民直接的確認、同意佮背書，干焦算是政府單方面强制實施的鴨霸憲法。

為著爭取人民thang直接和政府拍（修改）契約（憲法）的權利，咱不得不佇《公投法》補正通過了後，閣繼續為著台灣民主的理想行落去。無管是m是愛閣另外行24冬，毋知愛ka台灣閣踅過幾箍輾？嘛毋知咱愛閣鬥陣枵餓禁食幾擺？

總是，咱絕對袂放棄，因為咱清楚知影，土地屬佇人民，政府是人民組成的，國家主權嘛屬全部人民所擁有。人民當然有修訂憲法的權利，嘛有同意、拒絕憲法條文實施的權利。

政府若違背人民、壓制人民，就是惡奴欺主。這時，主人就需要做伙來甲教示，ka付託予yn 的權力，攏總收收提倒轉來。

雙3/4立法院的修憲議決，加上需要選舉人總數過半的同意票的修憲複決，這根本是比鳥籠仔閣較細跤，嘛比鳥鼠籠仔閣較細跤，thang講是綁甲死死死、袂震袂動的修憲戶橂。

按照咱台灣投票的選舉史，孤項投票的得票紀錄，上懸的一擺是馬英九選總統，伊捌提過765萬票；相對修憲案，除非是立法院半暝仔食西瓜反症，通過雙3/4的關卡，交予咱人民複決，但是上少上少，咱嘛必須投出940萬張的同意票，才會當通過這个修憲案。我看，逐家猶是較早睏較有眠。hef根本就算是天落紅雨，嘛無可能發生的代誌。

知影想欲修改憲法是死棋，所以人民作主志工才會主張愛「降低修憲戶橂」。除了立法院的修憲提案、議決的戶橂愛降低；人民的複決戶橂嘛愛降低；另外，閣需要考慮增加人民、社團、政府部門等等，會當有修訂憲法的提案權。

總是，咱 m thang 數想欲一步登天。一步一步慢慢行，朋友相招做伙行，慢罔慢，總會有行到位的彼一工。

編按：本文有聲版，顧邦猷志工讀予你聽，請點 YouTube。