遠路恬恬行

又閣拍破家己踅台灣的紀錄，來到不熟似的萬里。逐擺欲去較生份的所在，我攏會問邦先生：你有去過無？嘛順紲想一下仔過去，我家己有去過無？會按呢問，就是彼咧所在阮無做伙去過，較捷行踏了後，阮罕咧開車去𨑨迌。雖然參與活動愛定定坐bafsu去集合真忝頭，m過因為遠路恬恬行，顛倒變做一款生活，講起來這款生活無意中嘛減一寡排碳量。林先生捌講：「共行踏宣揚理念、接觸人民、感動人民的工課，當做生活的一部分，每禮拜和志工老朋友見一擺面、做伙完成行踏工課，和去拍一場高爾夫、啉一罐麥仔酒，其實是仝款快樂的。」這馬，咱每個月見兩擺面爾，算起來是拍五折。

看遮的路名庄名：瑪鋉、鼓亭、石角、龜吼、野柳，真正有來到外地的感覺，通常地名路名是咱認識地理方位特徵以及人文歷史的根本。佇咱近代史，曾經有統治者用人名、外來的地名去替換，予咱沓沓仔袂記得上原底的名所代表的意，來毀滅人對這塊土地的認捌，長久以來確實有伊十足的效果。萬里會當保持遮的名，無兩位「中先生」的影，有夠好運！

漁港的味真濟款，佇山區蹛久矣，遮的味鼻起來真親切，有海味、魚仔味、生味、臭鮮味、船仔味……攏濫濫做伙，是一款咧拍拚的味。啊！看著海矣，閣看著基隆嶼。往核二廠的方向，正手爿是海、倒手爿是山，海上有一寡商船停佇遐，畫面真恬靜。倒手爿的淺山，色水真青，古早一定有石虎生活佇遮，無的確這馬嘛有咧，只是林務局攏無ka經費開佇做調查，因為做調查m是百姓目睭看的著的成績，就會先予公部門放棄，m過做調查是保育的基本工課啊！沿路的大石頭有影媠，佇海邊的、佇山邊的、抑是予公路破開的，攏大甲真奇妙！

行到東澳、野柳，一棟建築物傳來YMCA的歌聲，行較接近的時，原來是海洋世界，我m捌去過遐，我無法度去看動物做表演，想著yn蹛佇水池m是大海來受控制，就真無奈。天公伯仔今仔對阮真好，無出大日頭，哪無，行佇海邊的公路，恐驚會曝甲烏焦。

頭殼內忽然間跳去想著順兄，伊已經對行踏的人生畢業，今仔日抑是另工，袂閣有順兄來做伙行踏矣，想起來就嚨喉管滇，這條核二廠到金山的路，順兄行過，有伊的跤跡。人的身體攏有使用期限，順兄的身體袂當閣行「降低修憲戶橂」，伊的精神會陪阮行，行到《希望有一工》的彼工。

講著《憲法》，就會有「四字」予濟濟人真感冒，我敢就袂感冒？

講這部憲法m是咱的，共咱台灣人無涉，是啊，伊本來就是依據統治規个大中國的需要去設計的，足濟規定攏無可能適用佇咱小國台灣，所以咱愛揣著方法予伊真正共咱無底代。是講護照閣咧貼貼紙一四界走矣，咱國內的根本大法，管待伊有彼四字。問題是，咱人民哪無提著修改的權力，彼四字是欲安怎擲棄捒？m知逐家有想過無？咱所做的三項工課：補正公投法、修正選罷法、降低修憲戶橂，yn有啥物共同的所在？想看覓咧，心肝頭應該就袂閣予彼四字硩著著矣！