2018年4月19日

制憲？修憲？

美月姊喙甜人媠心肝好，伊ka我講：「你用這20塊船枋來解說修憲和制憲，規尾攏是仝一條路，實在真讚！以後我嘛thang用來解說予別人知。」

是啦！20冬拄好是一个幼嬰，對出世到長大成年，變做一位成熟公民所需要的時間。

假使，咱每一冬攏會當kā現此時硩佇咱頭殼頂的這部憲法修一寡掉……譬論講，頭一冬咱先招一寡較資深的國民來修改第一章；明年予另外一陣人來研究修改第二章……（繼續修、繼續修、繼續修修修……）；台灣土地頂的這部R.O.C.憲法，算來總共有十四章，加上進前六擺（因為七擺內底第五擺發生違憲的修憲無準算）的修憲條文，拄好會當用20冬的時間，予咱來詳詳細細、一條一條、寬寬仔檢查、慢慢仔修改。按呢你看，經過所有國民20冬的認真拍拚，咱是m̄是就thang修出一部和進前完全無仝的新憲法？

這就好親像20塊船枋組成的生鉎船，靠著船頂所有船員的齊心協力，一冬換掉一塊船枋，新枋仔料船員做伙參詳決定，20冬了後，就thang變做一隻新迸迸合船員所用的四序現代船。

你看按呢好無？頭冬頭擺的修憲，咱就對美月阿媽、清長阿公、過省阿媽閣天壽阿公……怹開始，對第二冬一直到第十九冬，每一冬嘛攏有一寡阿公阿媽輩怹的親情五十，抑是朋友八十，相招做伙來換、換、換……換「台灣修憲號」這隻船的船枋，一目nih仔20冬的歲月真緊就過，第二十冬這時，無論是美月、過省阿媽抑是天壽、清長阿公……怹這个乖孫嘛攏大漢矣，時代嘛已經無相像矣，拄成做台灣新公民的孫仔輩，怹對國家、社會一定會有一寡和阿公阿媽、抑是阿爸阿母無仝款的想法佮期待，對著怹欲和政府拍的契約書，的確有需要愛按照新時勢的變化，來做淡薄仔修改，來改予較合怹的時代，thang較好生存、較好過日子、較有幸福感覺的一个國民意志總目標。

你看，每一代、每一冬的每一个人，是m̄是攏有thang做著主人？若準怹佇每一擺換船枋（修憲）的時，攏有鬥想步、鬥出力，按呢，怹佇憲法契約書面頂，就會留落每一个時代國家主人的共同心血佮簽名記號，來表示怹對家己對國家的負責佮擔當。

人的觀念，是無法度一時隨就改變的，所以咱無惜用久長的時間，一步一跤印，傳單一張一張分，用滴水迵石的精神，進行自我教育，累積、拓展國民的主人意識，藉著按呢，咱才會當kā原底的舊憲法，一步一步、沓沓仔ka修改做新憲法！

透過一擺閣一擺的修憲過程，予做伙佇這个所在徛起的台灣人民，一擺閣一擺展現出咱共同的意志。每一回修憲的進行，攏會當予逐家閣一擺清楚了解，每一位國民攏是不得欠缺的國家主人，大家攏需要替國家認真思考，做出有智慧的決定，共同承擔所有的後果。

其實，這个修憲過程（程序），嘛是主張制（新）憲者，佇所欲制定的新憲法內底，需要清楚規定寫明的。一旦制憲成功，會當無阻礙予國家主人隨thang實施進行的憲法修改條款。若欠缺這个修憲程序，新憲法嘛會仝款是一部殖民式憲法，人民就猶閣是奴隸，m̄是主人。