我無法度寫好二二八的詩

我無法度寫好有關二二八的詩

彼時陣的失望佮艱苦

　　　　驚惶佮無奈

毋是慣勢民主社會的我會當理解

咱只好唱歌　唱出紀念的歌

用歌聲來代替哭聲

我無法度寫好任何二二八的詩

彼時陣的無情銃聲

　　　　暗夜哭聲

毋是佇今仔日歡喜度假的人會當體會

咱只好行路　行佮別人無仝的路

為著台灣袂閣埋冤

七十一年前有偌濟人無故犧牲

彼時陣的期待遮爾殘酷

七十一年後有偌濟人猶原思念

現此時的思念遮爾傷悲

我只有感動著紀念二二八的歌詩

恬恬流著目屎

　　唱袂出聲

咱繼續行路　堅持行這條台灣路

總有一工

台灣人會當做家己的主人