十六工哭三擺

五月十一彼工了後，我佇厝內、倒佇膨椅，無張無弛會流目屎，大概是想起禁食行動的畫面，嘛會想起一四年落實民主停建核四的畫面，嘛會想起未來敢閣會有禁食？有時啥物嘛無想，有時佮阿邦講話，嘛是流目屎，啊！就是真愛哭啦！毋知按呢的日子過偌久？忽然有一工，我發現家己親像真久無哭矣，彼工起，對家己有一个大發現：我變勇敢矣！

十一月八號這工，心內無憢疑、無煩惱，坐車入城去參與補正公投法行動。仝款的行動，佇四月五月已經做過一擺。仝款的場地，路按怎行真清楚，毋免揣地圖。

內心真單純，就是為補正公投法這件代誌，這十六工就是愛認真做工課。咱攏恬恬、袂吵袂鬧，電視報紙攏無興趣，採訪報導比頂回閣較少。無要緊，咱已經有寫文投稿的經驗，咱的行動咱家己寫。因為我變勇敢矣，對行動開始我攏無哭。

一直到第十工十七號，秀免老師禁食結束彼工，伊坐車欲轉去彰化的時，佇車頂接到林先生的電話，伊kā怹的對話傳去line，我看著的時，感覺若親像聽著怹兩人咧講話，我就目屎流落來。

「『秀免，辛苦矣！真忝乎？』聽著林先生的關心，即時我忝頭的感覺攏消失矣！滿心歡喜kā伊講：『袂啦！我比您少年，我的意志堅強，一定綴您的跤步前進！請您嘛愛保重身體！』」

隔轉工，我坐捷運欲去現場的時，佇車箱內想到這段話，嘛是閣哭！

第二擺，靜坐的布篷內底，有一對母仔囝。頂日有看著怹來過的相片，這工親目睭看著：媽媽坐佇上尾排，查某囡仔趴佇媽媽的跤腿，恬恬陪媽媽。啊！這个畫面，我又閣流目屎。我有一个想像，若準比咱較少年的爸爸媽媽，知影補正公投法這件代誌對囡仔真重要，攏chhōa怹的囡仔來遮坐，毋知會是啥物畫面？

第三擺，最後一工，行動結束這工。麗貴董事長讀行動結束聲明的時，聽著最後的無限期禁食這幾字，我就哭出來，我kā徛佇我倒手爿的美月姊攬咧，正手爿的天壽兄kā我講：愛較堅強--ê。

這十六工，雖然有哭，我猶原清楚，十一月佮五月比，這半年來，我有變勇敢。