行踏的人生——寫予馬偕牧師佮人民作主的兄弟姊妹
堅定的跤步，行踏的人生，咱為疼惜台灣咧行路。
老先覺講：莫關佇厝裡吐大氣，莫怨嘆人生親像一齣戲；
有行動才有出路，恬恬仔行，就是上有力的行動。
堅定的跤步，行踏的人生，咱為疼惜囝孫咧行路。
老志工講：毋免驚別人笑咱戇，戇人才有才調改變世界；
有行踏就有向望，恬恬仔行，就是上勇敢的抗爭。
一雙跤，會當行偌濟路？
一世人，會當踏偌濟塗？
青春算來若露水，人生無常像爍爁。
日頭一出來，阮就出門去行踏。
行過祖先開墾的土地，對這个都市行到彼个都市；
一擺閣一擺，一年閣一年，跤步毋捌停。
堅定的背影，行踏的人生，咱為追求民主咧行路。
老先覺講：毋免驚風雨按怎淋，冬天過去春天就會來。
有堅持才有公義，恬恬仔行，就是上堅定的追求。
堅定的背影，行踏的人生，咱為追求自由咧行路。
老志工講：毋免煩惱路有偌遠，路的彼爿就有咱的夢。
有掖種才有收成，恬恬仔行，就是上媠氣的人生。
一雙布鞋，會當行偌濟路程？
兩蕊目睭，會當看偌濟風景？
名利看做若浮雲，富貴甘願放水流。
日頭一出來，阮就出門去行踏。
行過先民種作的土地，對這个庄頭行到彼个庄頭；
一擺閣一擺，一年閣一年，跤步毋捌停。
