接力禁食者的心聲Day16（台文）
「落實民主、補正公投法」24小時接力禁食第11天（5/6）志工：張國龍
過去的努力，咱閣有一屑仔成果，今仔日咱才有機會踮咧遮，免申請，咱著有法度來表達咱的意見。但是任何一个政治人物，權力會予伊腐化，仝款，一个政治團體，權力嘛予in會腐化，咱希望伊看到今仔日意見的表達，in要有勇氣，修正咱所欲得的公投法。咱今仔日為著咱有機會來表達咱的意見，佮咱有勇氣徛出來予日頭曝、予風搧，我拄仔咧坐的時陣嘛看到足濟人咧拍咳啾、踮遐呿呿嗽，這著是咱所有願意奉獻的台灣人，咱「勇於承受」，咱嘛希望咱的任務有法度真順利來達成咱的願望！多謝各位！
「落實民主、補正公投法」24小時接力禁食第4天（4/29）志工：黃淑芳
咱好不容易已經共這遍的行動，連鞭矣著欲來結束。執行長共咱講，咱無論這遍的民進黨立委占大多數的這个立法院，是毋是佇這會期著會當補正公投法，會抑袂，攏毋是決定咱這遍行動的成功抑是失敗。執行長講咱這遍著是成功，因為咱的聲音，用十六工，遮爾矣大聲！無人像咱遮爾矣大聲，來講出咱的訴求！所以，咱充滿著歡喜的心，欲閣繼續來為著台灣來關心，此後的大小項，攏是咱做一个公民、做一个台灣國的國民，所要準備的心。我佇遮簡單報告。
「落實民主、補正公投法」24小時接力禁食第3天（4/28）志工：曹藍心
各位志工兄姊逐家好，逐家辛苦！我是坐佇第三工的禁食靜坐者曹藍心。一開始無想到是會按這種的方法來對執政黨做表達，我以為干焦行路咱的願望著會當達成，但並毋是按呢！當我坐落了後，我知影我佇遐，第三工的力量要堅持，對第二工接落要傳予第四工。坐落了後，著感覺要真用力，雖然是恬恬坐佇遐，哪會要遮爾用力、遮爾用力咧對執政黨表達阮的訴求：補正公投法。佮行路閣要較用力、比遊行閣要較用力、比「聲嘶力竭」閣要較用力，著是要坐落，才知影是要遮爾用力，咧對執政黨表達意見。佇我出發的彼一工，我佇客運頂閣有一的感想：我欲出發，哪會感覺真孤單，咱正濟人對這塊土地攏真疼惜，對空氣污染、對食物安全的一寡議題攏真關心，但是講到補正公投法我著會感覺我哪會按呢寂寞寂寞，想到今仔日欲來負責這个禁食靜坐的位置，目屎著流落來。選擇佇這工嘛有一的我個人的意義，這工是四月二八，我佇遮禁食、靜坐、過瞑，隔轉工的透早是我出世的日子，彼一工我著攏會「想像」我佇阮媽媽的子宮內底，恬恬仔佇遐「孕育」，我隔工著會出世，著會有足大的力量！阮的願望期待執政者５２０進前補正公投法，我希望這日以後的小BABY出世，著有一部公投法佇遐咧等伊，等伊成長，成長甲十八歲，伊會當運用伊的民權，咱的直接民權，未來的囡仔攏會當使用。多謝逐家！逐家辛苦！
