陳來興畫展致辭──台灣土地頂的練氣士（台文）
魏縣長、陳局長、各位貴賓、以及人民作主的志工兄弟姊妹，逐家午安、逐家好。
我是人民作主教育基金會的執行長劉明新，今仔日真歡喜，會當代表人民作主教育基金會，佇咱尊敬的陳來興志工，伊的畫展開幕的時，來講幾句話。
我熟似來興老師，是對１９９２年臺灣教師聯盟成立開始的，這２４年來，阮做伙辦過「新台灣人巡迴演講會」，做伙參加過「核四公投的千理苦行」，行過街頭，淋過大雨，這嘛是為人民作主、補正公投法咧做伙拍拚。阮早就是老戰友矣。
我熟似的來興老師，是一个有畫圖天才的人，嘛是一个天真、浪漫、熱情，閣無啥心機的人。有畫圖天才這部份，免我講，看伊的圖你就知。講伊是一个天真、浪漫、熱情，閣無啥心機的人，干焦看伊佇志工兄弟姊妹裡的人緣，你就攏了解矣，因為伊天真、浪漫閣熱情，逐家志工攏佮伊親hòo-hòo，真愛佮伊鬥陣做朋友。特別是佇咧佮逐家聚餐、啉酒的時陣，伊磕袂著就會徛起來唱歌跳舞、扭尻川花；無就雄雄共你攬落去，予你強欲袂喘氣。拄才我入來的時，伊真歡喜，大力共我攬一下，害我的腰脊骨險仔斷去。
在我來看，來興老師這世人總共做著三件大代誌：第一件，𠢕畫圖，無討債伊的天才；第二件，會曉參與社會運動，吸收土地佮人民的感動；第三件，真有智慧娶一个好牽手，若無秀免老師，我恐驚來興老師的圖會無了了，變做街友嘛無一定。
我雖然毋捌美術，毋過，看來興兄的圖，就若親像咧看著親人、序大仝款，感覺有熟似感佮親切感。人講，土地是哲學佮文學的塗壤，是音樂的肚臍，嘛是美術的搖笱，任何藝術攏袂當脫離家己生存的土地，脫離家己生存土地的藝術是無性命力的。咱看來興兄所畫的圖，為啥物有親切感，會感動？彼是因為伊所畫的是咱的鄉土、咱的土地上的人、事、物、佮歷史，每一張圖攏有一个故事，這是伊上了不起的所在。對１９８０年代開始，來興兄就真積極參與社會運動，追求台灣的民主自由，關心社會的公平正義，嘛關心弱勢者，包括農民、勞工、街友、流浪漢，攏捌出現佇伊的圖內底。所以，我會稱呼伊是「台灣土地頂的練氣士」，真正一點仔就無毋著。自來，伊就用伊的真心佮熱情，畫出對土地、鄉土的疼，伊佮這塊土地做伙哭、做伙笑、嘛做伙喘氣，這才是伊這个練氣士，金光沖沖滾，瑞氣千條，感動人的來源。
佇遮，我嘛欲提醒當年佇街頭佮阮做伙拍拚的政治人物，『莫忘初衷』，毋通袂記得恁當年佇街頭的熱情佮理想，嘛毋通袂記得選前恁對人民的承諾。今仔日，人民做主教育基金會的志工佇彰化行踏，宣揚「補正公投法、修正選罷法、修訂憲法」，落實直接民權，深化台灣民主的理念，就是向望台灣民主化的上尾一里路，會當早日來完成。尤其是補正公投法這項，對咱台灣面對中國威脅的時，是咱的護身符、救命仙丹，咱的確著愛緊通過才好。
上落尾，我欲用一句話來做結束：「痛苦會過去，毋過媠會留落來。」咱看這四箍輾轉來興兄的圖，每一張攏是咱台灣的歷史佮過去，有咱的鄉親序大佇街頭流血流滴的故事，嘛有咱的青春佮熱情的目屎。我相信，台灣人遮的痛苦，有一日攏會變做過去，毋過精神佮文化的媠，會永遠留佇來興兄的圖內底，傳予後代囝孫，予in會當想起咱這代人的拍拚。來興兄用伊的圖愛台灣，啊人民作主的志工兄弟姊妹，袂曉畫圖，就用阮的跤繼續愛台灣。我就講到遮，感謝逐家。
