漚立委考驗選民的記持
這兩個月來，我行過兩擺的「落選運動行踏」，11月14來到中和，目標是逐家叫伊是「半分鐘」的張慶忠。
看到牌仔寫「張慶忠30秒通過黑箱服貿」，想著舊年，堂堂一位國會議員，竟然佇國會殿堂做出掩掩揜揜(iap-iap)的行為，真正予人看破跤手。嘛按呢才引發「318學運」，閣予人笑伊是「半分忠」。
這款人欲閣出來選立委，伊共選民當作是遮呢無頭神、遮好買收喔？阮就是欲提醒選民，千萬毋通閣倩鬼提藥單，愛予這款人落選，臺灣才有好的未來。拜託！拜託！鄉親序大，逐家較精光咧，千萬毋通閣「戇猴擔石頭」矣！
註： 1. 漚立委：漚，音àu，爛的意思。
2. 記持：記憶。
3. 兩擺：兩次。
4. 服貿：台音 ho̍k-bōo。
5. 掩掩揜揜(iap-iap)：遮遮掩掩。
6. 倩鬼提藥單：請鬼開藥單，表示穩死的。 7. 予：音hōo，給，讓。
8. 鄉親序大：鄉親父老。 9. 較精光：較聰明一點。
10. 毋通：不要，不可以。 11.戇猴擔石頭：形容笨人挑石頭，白費力氣，沒有希望。
