予人感動ê隊伍
佇四月初知影「人民作主」ê團體欲來南投縣行踏，是真好奇閣歡喜。好奇ê是干焦出來行行踏踏，會當有甚麼力量；歡喜是自己會當參加這歷史性ê一刻。 感動ê代誌真濟，看著林義雄先生，攏無驕傲，真實在、真樸實，佮大家做陣行，同齊歇睏，面對「眾聲喧嘩」ê代誌，簡單說明，無惡意ê批評。 行踏ê公約內容予人感動，講行踏是非武力ê行動，對別人ê攻擊嘛袂用武力回應；行踏時袂當翕相、袂當講電話，每一ê人閣隨時愛做領導ê準備。這種服從領導，無個人主義行動，又閣擔起責任ê行事風格，使人感動。 北京語定定講「數大便是美」，台語嘛講，若行過就有跤跡（阮嘛真驚船過水無痕）。看阮ê隊伍彎彎斡斡，佇街仔路踅來踅去，過路ê人，霧煞煞，阮將「補正公投法」「修正選罷法」ê宣傳單分落，有人就呵咾，有人拍噗仔，嘛有人冷淡搖手，講「毋免」，親像啉水，燒熱抑是冰冷，自己上了解。嘛共阮上一課，家己感覺重要ê，別人無一定按呢感覺。 感動ê閣有真濟，來自各地ê志工，無所求，毋是為自己，這種疼惜自己疼惜朋友疼惜土地ê精神，值得代代流傳。
