《阮若拍開心內的門窗》　詞／王昶雄　曲／呂泉生

​

阮若拍開心內的門，就會看見五彩的春光，雖然春天無久長，總會暫時消阮滿腹心酸。春光春光今何在？望你永遠在阮心內。阮若拍開心內的門，就會看見五彩的春光。

​

阮若拍開心內的窗，就會看見心愛彼个人，雖然人去樓也空，總會暫時予阮心頭輕鬆。所愛的人今何在？望你永遠在阮心內。阮若拍開心內的窗，就會看見心愛彼个人。

​

阮若拍開心內的門，就會看見故鄉的田園，雖然路頭千里遠，總會暫時予阮思念想欲轉。故鄉故鄉今何在？望你永遠在阮心內，阮若拍開心內的門，就會看見故鄉的田園。

​

阮若拍開心內的窗，就會看見青春的美夢，雖然前途無希望，總會暫時消阮滿腹怨嘆。青春美夢今何在？望你永遠在阮心內。阮若拍開心內的窗，就會看見青春的美夢。

​

 

【註】1.阮 gún或guán，我們。2.拍開 phah-khui，打開。3. 彼个 hit-ê，那個。4.欲轉 beh tńg，想要回家。