臺灣欲正名，補正公投法──「世大運台灣正名空拍活動」致辭（臺文）

各位關心台灣前途佮出路的志工朋友，逐家平安，逐家好。​

今仔日人民作主的志工，真歡喜會當來參加這擺為臺灣正名「空拍」的活動。阮認為，這个活動，佇著的時間，做著的代誌，這擺的活動一定是成功的。毋過，我這馬上想欲佮逐家分享的觀點是：臺灣欲正名成功，愛先補正公投法。

咱臺灣的歷史有兩个真大的特色。第一个特色是，咱真𠢕換頭家，對十七世紀荷蘭、西班牙、鄭氏王朝、清帝國、日本，到中華民國這个走路政權，短短四百冬，咱總共換過6个頭家。毋過，咱台灣人，到今攏猶毋捌真正做過頭家過。第二个特色是，咱這馬佇外國有真濟不三不四的名稱，啥物「台北經濟文化代表處」、「台灣貿易中心」，「辦事處」、「代表處」一大堆，毋過「大使館」才20个爾。佇體育比賽方面，咱嘛予人叫做「Chinese Taipei」、「中華臺北隊」，和這馬開一兩百億舉辦的「世界大學運動會」，咱就毋敢叫咱國家的名是「台灣」，你講有悲哀無？

我想，逐家攏真清楚，造成這款運命的原因是結構性的：因為咱猶毋是一个予國際社會承認的正常國家。咱必須要面對，目前咱對外的國名「中華民國」，已經無存在矣。伊已經袂當代表中國，嘛袂當代表臺灣；伊對中國已經無主權，對臺灣嘛無主權。簡單講，伊的結構佮本質，是一个中國的流亡政府的本質，所以才無法度受著國際社會的承認。

​​按呢講起來，代誌就清楚矣。咱袂當便若拄著予國際社會打壓，就喝一擺「Taiwan is not Chinese Taipei」、「Let Taiwan be Taiwan」。因為，喝過了後，打壓原在，問題並無解決。咱欲按怎才會當改變規个「中華民國」流亡政府的結構咧？我認為，用公民投票的方式，才會當向國際社會正式發聲，才會當用普世的價值，得著國際社會的承認，最後正名成功。

所以，咱拜託現場每一位關心台灣前途佮出路的志工朋友，攏做伙來為公投法拍拚，年底進前，予「補正公投法」的法案，佇立法院通過。按呢，咱就會當用公投法訓練人民做主人的氣質。咱會當先對地方性的公投開始，予公投生活化，予臺灣人一步一步慣勢公投。比論講：新北市干豆到淡水的快速道路欲起無？臺北市學校內的銅像欲拆無？中正路、中山路欲改名無？甚至，十箍銀角仔，欲用十箍阿媽莊朱玉女的尪仔頭無？省政府、監察院、考試院欲廢掉無？攏會當成做咱公投的項目。久來，這種大範大範做頭家的氣質就培養出來矣。到時，人民攏金光搶搶滾，全世界就無人有法度閣叫咱做奴才矣！

總講一句，我欲佮逐家分享的想法是，只有通過補正公投法，臺灣正名運動，才有可能成功。世間無一步登天的代誌，建國一定愛照步來，千萬袂當：未曾學行，先學飛；未曾掖種，想挽瓜。所以，公投，其實就是咱上跤踏實地、唯一的撇步。

上落尾，我欲用先賢蔣渭水講過的兩句話做結束，蔣渭水講：同胞須團結，團結真有力。欲通過補正公投法，咱一定愛團結。這馬，咱做伙來喝口號：同胞須團結，團結真有力。台灣欲正名，補正公投法；台灣欲正名，補正公投法。